جنگشاهي رورل هيلٿ سينٽر ۾ بنيادي سهولتون اڻلڀ، رهواسين ۾ ڳڻتي
رپورٽ: جاويد جان)
جنگشاهي جي رورل هيلٿ سينٽر (RHC) ۾ بنيادي سهولتن جي کوٽ ۽ انتظامي لاپرواهي سبب علائقي واسين ۾ سخت ڳڻتي پکڙيل آهي. مقامي رهواسين موجب اسپتال ۾ ڊاڪٽرن ۽ دوائن جي کوٽ سان گڏ صفائي جو نظام پڻ ناقص آهي.
اسپتال ۾ پيئڻ جي صاف پاڻي لاءِ لڳل ڪولر ۽ فلٽر ناڪاره بڻيل آهن، جڏهن ته پاڻي جي ٽينڪن جا ڍڪڻ نه هجڻ ۽ ٽينڪن اندر گندگي جمع هجڻ سبب مريضن کي صاف پاڻي جي سهولت ميسر ناهي. رهواسين جو چوڻ آهي ته گندو پاڻي استعمال ڪرڻ سبب مريضن ۾ پيٽ جي بيمارين جا خدشا وڌي رهيا آهن.
ٻئي طرف اسپتال جو ٽرانسفارمر به ڪافي عرصي کان خراب هجڻ جي شڪايت ڪئي وئي آهي. جهڙالي موسم ۾ سولر سسٽم صحيح نموني چارج نه ٿيڻ سبب فريزر ۾ رکيل پوليو ويڪسين ۽ ڇتي ڪتي يا نانگ جي ڏنگ لاءِ استعمال ٿيندڙ انجيڪشنز جي حفاظت بابت پڻ خدشا ظاهر ڪيا ويا آهن.
مقامي رهواسين الزام هنيو آهي ته اسپتال جي ماهوار بجيٽ جي استعمال بابت به شفافيت جي ضرورت آهي، ۽ مطالبو ڪيو آهي ته صحت کاتو معاملن جي فوري جاچ ڪرائي. علائقي واسين وزير صحت، سيڪريٽري صحت، ڊي ايڇ او ٺٽو ۽ ڊپٽي ڪمشنر ٺٽو کان مطالبو ڪيو آهي ته جنگشاهي RHC جو فوري نوٽيس وٺي، اسپتال ۾ ڊاڪٽرن، دوائن، صاف پاڻي، بجلي، صفائي ۽ ٻين بنيادي سهولتن جي فراهمي يقيني بڻائي وڃي ۽ غفلت جا ذميوار هجن ته انهن خلاف قانون موجب ڪارروائي ڪئي وڃي.
***