جنگشاهي: پاڻي جي کوٽ، اڻ اعلانيل لوڊشيڊنگ ۽ ريل گاڏين جي اسٽاپ بحالي لاءِ شٽر بند هڙتال. جنھن ۾ جنگشاهي جي شهرين، آسپاس جي ڳوٺاڻن، سياسي ۽ سماجي شخصيتن، واپاري اڳواڻن ۽ مختلف تنظيمن جي سڏ تي پاڻي جي شديد کوٽ، بجلي جي اڻ اعلانيل لوڊشيڊنگ ۽ ريلوي انتظاميا پاران جنگشاهي ريلوي اسٽيشن تي ريل گاڏين جا اسٽاپ ختم ڪرڻ خلاف مڪمل شٽر بند هڙتال ڪئي وئي. ان موقعي تي شهر جي مکيه بازارون مڪمل طور بند رهيون، جڏهن ته وڏي انگ ۾ شهرين احتجاجي مظاهرو ڪري حڪومت، واپڊا ۽ ريلوي اختيارين خلاف سخت نعريبازي ڪئي. مظاهرين مطالبو ڪيو ته جنگشاهي ۽ ڀرپاسي وارن علائقن ۾ پيئڻ جي پاڻي جي کوٽ جو فوري نوٽيس وٺي، پاڻي جي فراهمي يقيني بڻائي وڃي، بجلي جي اڻ اعلانيل لوڊشيڊنگ ختم ڪئي وڃي ۽ جنگشاهي ريلوي اسٽيشن تي بند ڪيل ريل گاڏين جا اسٽاپ فوري طور بحال ڪيا وڃن. احتجاج ڪندڙن خبردار ڪيو ته جيڪڏهن سندن جائز مطالبا جلد تسليم نه ڪيا ويا ته احتجاج جو دائرو وڌيڪ وسيع ڪيو ويندو، جنهن جي ذميواري لاڳاپيل اختيارين تي هوندي.