پريا ڪماري، فضيلا سرڪي ۽ ڪجھھ ٻين اغوا ڄاڻايل نياڻين جي باري ۾ انھن جي مائرن ۽ پيئرن سميت لڳ ڀڳ پوري سڄاڻ سنڌ ڄاڻي ٿي تھ انھن کي ڪنھن اغوا ڪيو آھي؟ ۽ ھن وقت اھي ڪھڙي ڪوٽ ۾ قيد آھن؟؟ پر بزدليءَ سبب نالا نٿا کڻن ۽ اڌ بزدلي / اڌ جرئت ( جيڪو بھ نالو ڏجي) وچان جڏھن پيپلز پارٽي جي ايم اين اي رميش ڪمار پريس جي آڏو دليري ڏيکاري آھي ۽ اقرار ڪيو تھ پريا ڪماري کي جنھن اغوا ڪيو آھي ۽ اغوا ڪندڙ جي نالي جي کيس خبر آھي تھ پوءِ معاملو ڪافي آسان ٿي ويو آھي، آءِ جي سنڌ کي رميش ڪمار کان قانوني مدد وٺڻ گھرجي ۽ اغواڪار تائين پھچڻ ۽ کيس گرفتار ڪرڻ ۾ دير نھ ڪرڻ گھرجي ۽ جيڪڏھن آءِ جي سنڌ پنھنجو فرض منصبي پورو نٿو ڪري تھ پريا ڪماري جي والدين کي آءِ جي سنڌ کي ڪورٽ ۾ گھلڻ گھرجي، بلڪل سادا قانوني طريقا موجود آھن، پر اھو سڀڪجھھ نٿو ڪيو وڃي، آخر ڇو؟! ان جي پٺيان ڪھڙا سبب آھن؟!
چيو وڃي ٿو تھ اڳين ڌر ايتري طاقتور آھي جو ٻيا تھ ٺھيو پر پيءُ ماءَ بھ پنھنجي ٻار جي بازيابي لاءِ نالو کڻڻ کان ڊڄن ٿا!
ڇا ان ماءُ جي درد۽ ڪرب کان بھ وڌيڪ طاقتورآهن اغواڪار؟! جنھن جي نياڻي ھن جي اکين جي اڳيان اغوا ڪئي وئي ھجي ۽ کيس اغواڪار جي خبر بھ ھجي! پر سندن خوف ۽ نياڻي جي زندھ سلامتي لاءِ اھي ماٺ جو روزو رکن!!
پيپلز پارٽي جي ايم اين اي ھڪ قسم جو پريا ڪماري جي ماءُ پيءُ ۽ پوليس تي کليل الزام لڳايو آهي تھ انھن کي سڄي خبر آھي، پر نالو زبان تي نٿا آڻين! اھو تھ اغواڪارن جي مدد ڪرڻ جي مترادف آھي.!
جيڪڏھن پيءُ ماءُ نالو نھ کڻندا تھ پوءِ ڪير کڻندو؟!
ٿي سگھي ٿو تھ والدين پوليس وٽ نالو کنيو ھجي، پر پوليس روايتي وڏيري جي پرده پوشي ڪندي ھجي، ان ڪري جيڪڏھن پيءُ ماءُ کي انھن جي نياڻي سچ پچ ۾ کپي تھ کين سنڌ جي ماڻھن آڏو اڀ ڏاريندڙ رڙيون ڪرڻ بجاءِ ان وحشي درندي جو نالو کڻڻ کپي، جنھن وٽ پريا قيد آھي، پوءِ ڏسو تھ ڪيئن توھان جي بيوسي ختم ٿي ٿئي! ۽ سنڌ جو ماڻھو ان وحشي درندي جو حشر ٿو ڪري!
جيڪڏھن والدين کي موت جو خوف ٿو ٿئي تھ پوءِ اسين اوھان جي حالت ڏسي اوھان کي زنده انسان نٿا سمجھون، پر ھڪ اھڙو پکي ٿا سمجھون جنھن کي اڌ سير وجھي ڦٿڪڻ لاءِ پَٽَ تي اڇلايو ويو ھجي!
”جھرڪي پنھنجي ٻچي کي بچائڻ لاءِ باز سان وڙھي پوندي آھي.!!“ ***