پاڪستان ۽ ايران جو ٻطرفي واپار 10 ارب ڊالر تائين وڌائڻ جو عزم
(رپورٽ: ڊان اخبار جي ٿورن سان)
اسلام آباد: پاڪستان ۽ ايران ٻطرفي واپار کي 10 ارب آمريڪي ڊالر تائين وڌائڻ جي عزم کي ورجايو آهي. ان سلسلي ۾ پاڪستان جي واپار واري وفاقي وزير جام ڪمال خان چيو ته ٻنهي ملڪن جي تاريخي ۽ ڀائراڻن لاڳاپن کي مضبوط معاشي ڀائيواري ۾ تبديل ڪرڻ وقت جي اهم ضرورت آهي. هي اظهار پاڪستان-ايران گڏيل واپاري ڪميٽي (Joint Trade Committee) جي ڏهين اجلاس دوران ڪيو ويو، جيڪو 3 کان 5 آگسٽ تائين اسلام آباد ۾ جاري آهي. اجلاس جي گڏيل صدارت پاڪستان جي واپار واري وزير جام ڪمال خان ۽ ايران جي صنعت، کاڻين ۽ واپار واري وزير محمد اتابڪ ڪئي.
جام ڪمال خان زور ڀريو ته پاڪستان ۽ ايران وچ ۾ آزاد واپاري معاهدي (Free Trade Agreement - FTA) کي جلد حتمي شڪل ڏني وڃي، جيئن ٻنهي ملڪن وچ ۾ واپار لاءِ نوان در کلي سگهن.هن چيو ته سرحدي لاجسٽڪس، مال برداري ۽ ڪسٽم جي عمل ۾ موجود رڪاوٽن کي ختم ڪرڻ ضروري آهي، جڏهن ته گڏيل سرحدي مارڪيٽن جي قيام ۽ اليڪٽرانڪ ڊيٽا جي مٽاسٽا (Electronic Data Interchange) سان واپار ۾ نمايان واڌ اچي سگهي ٿي.واپار واري وزير موجب ٻنهي ملڪن جو نجي شعبو واپار وڌائڻ لاءِ تيار آهي، هاڻي حڪومتن جي ذميواري آهي ته ڪاروبار لاءِ محفوظ، شفاف ۽ سازگار ماحول فراهم ڪن.ٻئي طرف ايراني وزير محمد اتابڪ پاڪستان کي ايران جو "ڊگهي مدي وارو اسٽريٽجڪ واپاري ڀائيوار" قرار ڏيندي چيو ته ايران ڪراچي ۽ گوادر بندرگاهن ذريعي علائقائي واپار ۽ لاجسٽڪس جي سهڪار کي وڌيڪ هٿي ڏيڻ چاهي ٿو. هن اميد ظاهر ڪئي ته پاڪستان ۽ ايران وچ ۾ آزاد واپاري معاهدو جلد طئي ٿي ويندو.اتابڪ چيو ته بجلي جي واپار ۽ علائقائي رابطن ۾ واڌ ٻنهي ملڪن لاءِ نون معاشي موقعن جا در کوليندي.
اجلاس دوران ٻنهي ملڪن واپار، سيڙپڪاري، ٽرانسپورٽ، رابطن ۽ نجي شعبي جي ڀائيواري کي وڌيڪ مضبوط ڪرڻ جي عزم جو به ورجاءُ ڪيو. ***