نوري آباد جي صنعتي زون مان نڪرندڙ زهريلي ڪيميڪل وارو پاڻي ويجهي علائقن لاءِ سنگين خطرو بڻجي ويو آهي. علائقي واسين موجب مختلف ڪارخانن مان خارج ٿيندڙ گندو ۽ زهريلو پاڻي بنا ڪنهن مناسب صفائي جي سڌو سنئون ڪلوکوھر ڊيم ۾ ڇوڙ ڪيو پيو وڃي، جنهن سبب نه رڳو ماحولياتي آلودگي وڌي رهي آهي، پر انسانن ۽ جانورن جي زندگين کي پڻ شديد خطرا لاحق ٿي ويا آهن. ڳوٺاڻن جو چوڻ آهي ته ڊيم جو پاڻي اڳ ۾ زراعت، مالوندن ۽ روزاني استعمال لاءِ ڪارائتو هوندو هو، پر هاڻي پاڻي مان بدبو اچڻ لڳي آهي ۽ ان جو رنگ به تبديل ٿي ويو آهي، جنهن ڪري علائقي ۾ خوف ۽ بيچيني پکڙيل آهي۔ ڳوٺاڻن وڌيڪ ٻڌايو ته اهو زهريلو پاڻي صرف ڊيم تائين محدود ناهي رهيو، پر اهو اڳتي هلي مشهور ڪينجهر ڍنڍ ۾ پڻ شامل ٿي رهيو آهي،ڳوٺاڻن موندر خان پالاري، عامر بلاول پهنل پالاري ۽ ناصر علي پالاري ميڊيا سان ڳالهائيندي چيو ته زهريلو پاڻي واپرائڻ سبب سندن مال مرڻ لڳو آهي، جڏهن ته ڪيترائي ڍور مختلف بيمارين ۾ مبتلا ٿي چڪا آهن. سندن چوڻ هو ته جانورن ۾ ڪمزوري، چمڙي جون بيماريون ۽ ٻين خطرناڪ علامتن ۾ اضافو ٿي رهيو آهي، جنهن سبب مالوند سخت پريشان آهن. هنن الزام هنيو ته صنعتي ڪارخانا ماحولياتي قانونن جي ڀڃڪڙي ڪندي بنا ٽريٽمينٽ جي زهريلو پاڻي نيڪال ڪري رهيا آهن، جڏهن ته لاڳاپيل ادارا خاموش تماشائي بڻيل آهن۔. ڳوٺاڻن حڪومت، سنڌ ماحولياتي تحفظ واري اداري ۽ ضلعي انتظاميا کان مطالبو ڪيو آهي ته فوري طور تي ڪيميڪل وارو پاڻي بند ڪيو وڃي ٻئي صورت ۾ جنهن جي سموري ذميواري لاڳاپيل اختيارين تي هوندي. علائقي واسين مطالبو ڪيو ته ڪارخانن جي نيڪال ٿيندڙ پاڻي جي جاچ ڪرائي ذميوارن خلاف قانوني ڪارروائي ڪئي وڃي ته جيئن انسانن، جانورن ۽ قدرتي وسيلن کي وڌيڪ نقصان کان بچائي سگهجي۔.