تعليمدان، اسڪالر ۽ جديد ٽيڪنالاجي جي ماهر ڊاڪٽر محمد اجمل ولد عبدالرزاق ساوند جو جنم 18 جولاءِ 1982ع تي گلشير محلو، تعلقي ڪنڌڪوٽ، ضلعي ڪشمور ۾ ٿيو. هن ابتدائي تعليم کان پوءِ ڪئڊٽ ڪاليج لاڙڪاڻي مان انٽرميڊيٽ مڪمل ڪيو ۽ پوءِ مھراڻ يونيورسٽي ڄامشوري مان سافٽ ويئر انجنيئرنگ ۾ بي. اي (B.E) جي ڊگري حاصل ڪئي.

اعليٰ تعليم لاءِ هن فرانس جو رخ ڪيو، جتي جين مونيٽ يونيورسٽي سينٽ ايٽائين مان ڪمپيوٽر سائنس ۾ ماسٽرس ڪئي، جڏهن ته پئرس ڊيسڪارٽس يونيورسٽي مان ساڳئي شعبي ۾ پي ايڇ ڊي مڪمل ڪيائين. سندس پي ايڇ ڊي جو موضوع آرٽيفيشل انٽيليجنس (مصنوعي ذهانت) هو، جيڪو جديد دور جو هڪ اهم ۽ تيزي سان ترقي ڪندڙ ميدان آهي.

پي ايڇ ڊي کان پوءِ ڊاڪٽر اجمل ساوند ساڳئي يونيورسٽيءَ ۾ رياضي ۽ ڪمپيوٽر سائنس جي شعبي سان لاڳاپيل رهي، جتي هن اسسٽنٽ پروفيسر ۽ ريسرچ ايسوسيئيٽ طور خدمتون سرانجام ڏنيون. هو ڪيترين ئي ٻولين، جن ۾ سنڌي، اردو، سرائڪي، بلوچي، انگريزي ۽ فرينچ شامل آهن، تي عبور رکندو هو. سندس علمي قابليتن کي مڃيندي، پئرس ڊيسڪارٽس يونيورسٽي کيس 2013ع-2014ع دوران ريسرچ ڪميشن ۾ پي ايڇ ڊي شاگردن جي نمائندگي لاءِ چونڊيو.

فرانس ۾ اعليٰ علمي خدمتن کان پوءِ هن پنهنجي وطن واپس اچي سکر آئي بي اي يونيورسٽي ۾ اسسٽنٽ ڊائريڪٽر طور ڪم شروع ڪيو. هن ڪيترائي تحقيقي مقالا عالمي جرنلن ۾ شايع ڪرايا ۽ نوجوانن کي جديد تعليم ڏانهن راغب ڪرڻ ۾ اهم ڪردار ادا ڪيو.

افسوسناڪ طور 6 اپريل 2023ع تي هيڏي پڙهيل ڳڙهيل ڌرتي جي عظيم صالح فرزند ڊاڪٽر اجمل ساوند کي سندس اباڻي علائقي ۾ منحوس قبيلائي تڪرارن جي  ور چاڙهيو ويو ۽ هٿياربندن فائرنگ ڪري کيس شهيد ڪري ڇڏيو. هن المناڪ واقعي تي سنڌ سميت ملڪ ۽ دنيا جي علمي ۽ صحافتي حلقن سخت ردعمل ظاهر ڪيو ۽ هن علم دوست شخصيت جي وڇوڙي کي وڏو نقصان قرار ڏنو.

ڊاڪٽر محمد اجمل ساوند هڪ باصلاحيت استاد، محقق ۽ قوم جو قيمتي اثاثو هو، جنهن پنهنجي علم ۽ صلاحيتن سان نه صرف سنڌ، پر عالمي سطح تي به سڃاڻپ ماڻي.