ڀارتي سپريم ڪورٽ جي چيف جسٽس سوريڪا غرور ۽ تڪبر وچان يا غلطيءَ سان 15- مئي 2026ع تي (صرف ھڪ ھفتو اڳ ۾) ڀارت جي جين - زي بيروزگار نوجوانن ۽ سياسي ۽ سماجي ورڪرز  کي ڪاڪروچ سان تشبيھھ ڏيندي چيو تھ:” اسان جو اھو نسل پورو وقت نيٽ تي ويھي وقت برباد ڪري ٿو ۽ اھي ڪاڪروچ آھن.“

16مئي تي چيف جسٽس جي وصف رکندڙ ھڪ ڪاڪروچ نالي ابيجيت سوشل ميڊيا تي Voice of  Lazy & Unemployed جي نالي سان ويب سائيٽ لانچ ڪندي، چيف جسٽس جي پوري جين - زي نسل ۽ بيروزگارن خلاف ڪيل چٿر کي ڀرپور تنقيد جو نشانو بڻايو ۽ ان ويب سائيٽ ذريعي Cockroch Janta Party جوڙڻ جو اعلان ڪيو. ۽ اڄ جي سياسي سماجي تاريخ جو عظيم ڪارنامو ۽ ڪرشمو ڪري ڏيکاريو آھي. 22- مئي صرف ھڪ ھفتي اندر ڪاڪروچ جنتا پارٽي جي آفيشل ٽوئيٽر اڪائونٽ تي پوري ڀارت جا 2.1 ڪروڙ ڪاڪروچ ميمبر ٿي چڪا آھن. سوشل ميڊيا جي ماھرن جي چوڻ مطابق، اھو انگ ڀارت جي سڀ کان وڏي  ٽوئيٽر اڪائونٽ جي ميمرشپ رکندڙ مودي سرڪار جي ڀارتي جنتا پارٽي کان سٺ سيڪڙو وڌيڪ آھي، ڪانگريس ۽ عام آدمي پارٽي تھ ان ڊوڙ ۾ ڪاڪروچن کان ڪوھين ڏور آھن، ڪاڪروچ جنتا پارٽي جي اھا ميمبرشپ عام آدمي پارٽي کان ڇھوڻ تي وڌيڪ آھي.

ڪاڪروچ جنتا پارٽي جو سرواڻ اڀيجيت 2020ع کان 2023ع تائين ٽي سال عام آدمي پارٽي جي سوشل ميڊيا ٽيم جو حصو رھيو آھي ۽ ھن کي اڄ جي سوشل ميڊيا جي طاقت جو ڀرپور احساس آھي ۽ ھن سوشل ميڊيا کي بھترين نموني سان استعمال ڪيو. ڪاڪروچ جنتا پارٽي جي منشور مان ئي صاف ظاھر آھي تھ ڀارت جا ڪروڙين بيروزگار نوجوان پنھنجي حڪمران طبقن، اسٽبلشمينٽ ۽ موجوده سياسي پارٽين کي ئي پنھنجي بيروزگاري، غربت ۽ بيوسيءَ جو ذميوار سمجھن ٿا ۽ انھن جين - زي نوجوانن کي ان تي شديد غصو تڏھن اچي ٿو، جڏھن اھي ڦورو ۽ غاصب حڪمران طبقا وري نوجوانن کي سست، ڪاھل ، ڪمچور ۽ ڪاڪروچ سمجھن ٿا ۽ چون ٿا. انھن حڪمران طبقن جي خلاف شديد غصي ۽ غيرت جي گھرائي ڪاڪروچ جنتا پارٽي جي پنج-نقاطي منشور کي غور سان سمجھڻ سان معلوم ٿي ويندو.

ڪاڪروچ جنتا پارٽي جو پھريون نقطو آھي تھ:”سپريم ڪورٽ جو چيف جسٽس ريٽائر ٿيڻ جي ڇھن مھينن کان پوءِ (ڀارتي موجوده آئين مطابق) لوڪ سڀا جو ميمبر ٿي نھ سگھندو.“ ٻيو نقطو آھي:” ڪو بھ ايم پي (لوڪ سڀا ميمبر) پارٽي تبديل ڪرڻ جي صورت ۾ ويھن سالن تائين ڪو بھ سرڪاري عھدو حاصل ڪري نھ سگھندو.۽ ووٽ کي چوري ٿيڻ ھرگز نھ ڏنو ويندو.

ٽيون ڪاڪروچ پارٽي اقتدار ۾ اچي ھاڻوڪي مودي سرڪار جي سڀني وزيرن مشيرن توڙي ٻين حڪومتي عھديدارن جي اڪائونٽس جي غيرجانبدار اداري کان تحقيق ڪرائيندي. چوٿون، لوڪ سڀا ۽ ٻين عھدن تي پنجاهھ سيڪڙو عورتن جي نمائندگي ھوندي.

پنجون، ڪاڪروچ پارٽي اقتدار ۾ اچي حڪومتن جي ناجائز مدد ڪندڙ ۽ حقيقي رپورٽنگ نھ ڪندڙ وڏن ميڊيا چينلن تي بندش وجھندي.

ڪاڪروچ جنتا پارٽي جي پنج نقاطي منشور تي غور ڪرڻ سان ٻيو ڪجھھ سمجھھ ۾ اچي يا نھ، پر ھڪ ڳالھھ بلڪل واضح آھي تھ ڀارت جو مظلوم عوام پنھنجي حڪمران طبقن کي پنھنجي مصيبتن جو ذميوار سمجھي ٿو ۽ انھن کان شديد ترين نفرت ڪري ٿو. اھوئي سبب آھي جو جڏھن جين - زي جي بيروزگار نوجوانن کي Voice of Lazy and Unemployed جي پليٽ فارم تان پنھنجي آواز کي اٿارڻ جو موقعو مليو تھ انھن ھڪ ھڪ صدي جي سياسي پارٽين ۽ طاقتور حڪمرانن کي پنھنجي آواز جي طاقت ۽ شدت ذريعي ذري گھٽ زمين دوز ڪري ڇڏيو.

جين زي جي بيروزگار نوجوان جو ھي طاقتور آواز ڀارتي حڪمران طبقن کي ايترو ڊيڄاري ڇڏيو آھي جو انھن ڪاڪروچ پارٽي جي ٽوئيٽر اڪائونٽ تي ڀارت ۾ بندش وجھي ڇڏي آھي.