چيني ڪار ٺاهيندڙ ڪمپني چيري هڪ بي مثال ڪارنامو سرانجام ڏنو آهي. جنهن ۾ ٽربو پاورڊ اسپورٽس يوٽيلٽي گاڏي (SUV) ذريعي طاقتور يانگتسي درياهه کي پار ڪيو ويو. ڪمپني جي طاقتور جِي ٽوَر G700 SUV پاران انجنيئرنگ جو هي ڪارنامو صرف مارڪيٽنگ جو ڏيکاءُ نه هو، بلڪه هن سان چين جي گاڏين جي صنعت جي وڌندڙ ٽيڪنيڪل خواهشن ۽ جديد انجنيئرنگ صلاحيتن جو مظاهرو ڪيو ويو، جيڪي روايتي حدن کان گهڻو اڳتي وڌي رهيون آهن.
هي طاقتور اليڪٽرڪ جِي ٽوَر خميس جي صبح وُوهو، مرڪزي آنهُوئي صوبي جي هيشازو فيري ٽرمينل تان روانو ٿي. ان گاڏي تقريباً 1.48 ڪلوميٽر (0.92 ميل) ڊگهو فاصلو سراسري 7 ڪلوميٽر في ڪلاڪ (4.5 ميل في ڪلاڪ) جي رفتار سان 22 منٽن ۾ طئي ڪيو ۽ ندي جي ٻئي ڪناري تي پهچي وئي. لائيو براڊڪاسٽ ۾ ڏٺو ويو ته پاڻي جي سطح گاڏي جي ٽائرن کان مٿي هئي، جڏهنته دروازن جا هينڊل پاڻيءَ جي سطح کان مٿي نظر اچي رهيا هئا.
ڊرائيور ۽ ڪو پائلٽ لائيف جيڪٽ پائي رکيا هئا ۽ ونڊوز کليون پيون هيون، جڏهنته اهي هڪ ٻئي سان واڪي ٽاڪي ذريعي رابطو ڪري رهيا هئا، ۽ ساڳئي وقت سپورٽ ٻيڙيون به ويجهو پٺيان هلن پيون. هن مظاهري جي سوشل ميڊيا لائيو اسٽريم کي 25 لک (2.5 ملين) ماڻهن کان وڌيڪ ڏٺو ويو.