ٽنڊومستي ۾ وحشت جي انتها!!
(رپورٽ : لياقت علي شيخ)
تفصيل موجب، خيرپور جي پرامن علائقي ٽنڊومستي ۾ مسمات خالده روبينه چانڊيو کي انتهائي بيدردي سان قتل ڪري لاش جي بيرحمتي ڪئي وئي. هن وحشياڻي واقعي کانپوءِ سڄي ضلعي ۾ خوف ۽ حراس سان گڏوگڏ عوام ۾ شديد ڪاوڙ واري لهر پکيڙجي وئي. مقتوله جي گهر ۾ ڪهرام مچي ويو ۽ نياڻي جي اڻوقتائي موت تي هر اک آلي ھئي!
مقامي ذريعن موجب، ٽنڊومستي جي حد ۾ جوابدارن پاران مسمات خالده روبينه چانڊيو مٿان ان وقت وحشياڻو حملو ڪيو ويو، جڏهن هوءَ پنهنجي گهر ۾ موجود هئي. جوابدارن پاران ڪاري جو الزام لڳائي، ماڻھن جي ھجوم ۾ روبينھ کي گھليندي مٿس سڌي فائرنگ ڪري قتل ڪري ڇڏيو، جڏھن تھ روبينھ پنھنجي بيگناھي بابت ليلائي صفائي ڏيندي رھي ۽ پنھنجي عزيزن کي اللھ جا واسطا ڏيندي رھي! واقعي کانپوءِ جوابدار غيرت جي نالي تي بيگناھھ عورت کي قتل ڪندي وڏي آسانيءَ سان هٿيار لهرائيندي فرار ٿيڻ ۾ ڪامياب ٿي ويا، جڏھن تھ پوليس ٻن جوابدارن جي گرفتاري جي دعويٰ ڪئي آھي. پوليس جو چوڻ آھي تھ ٻن جوابدارن کي موقعي تي گرفتار ڪري ورتو آھي. افسوس اھو آھي جو جوابدارن پوليس کي ٻڌائيندي چيو تھ، ٻھ ڏينھن اڳ روبينھ چانڊيو ۽ سندس سوئٽ پسند جي شادي ڪئي ھئي، برادريءَ جي ڪجھھ ماڻھن ملي ڪري ٻنھن کي اعتماد ۾ وٺي گھاريو ھو، روبينھ جڏھن ڳوٺ پھتي تھ سندس سوئٽ جيڪو گھوٽ پڻ ھو، اھو روبينھ کي اڪيلو ڇڏي فرار ٿي ويو! جڏھن تھ ڳوٺ وارن جنھن مان روبينھ جو مامو ۽ ٻيو عزيز ماڻھن جي ھجوم ۾ روبينھ کي بيدردي سان قتل ڪيو، روبينھ ليلائيندي رھي، پر سندن ڪو بھ قياس نھ آيو! سڄي علائقي ۾ وحشت تڏھن طاري ٿي، جڏھن ساڳئين درندن ٽنڊومستي لڳ قبرستان ۾ بنا ڪفن جي، ھڪ کڏ کوٽي لاش کي دفنائي ڇڏيو! قبر جي ويڊيو جڏھن سوشل ميڊيا تي وائرل ٿي ۽ ماءُ پيءُ جون عرش لوڏيندڙ دانھون جڏھن سوشل ميڊيا تي وائرل ٿيون تھ ھر اک آلي ھئي ۽ ھر درد رکندڙ دل روئڻ لڳي! ھن سڄي واقعي ۾ ٽنڊومستي پوليس جو عمل بھ انتھائي ڏکوئيندڙ رھيو، روبينھ جي ماءُ ۽ پيءُ کان ٽي لک ايف آءِ آر لاءِ رشوت ورتي وئي ۽ بجاءِ جو ڏوھارين جا گھر ساڙي راک ڪجن، پر روبينھ جي گھر کي ڊاھي ميسمار ڪيو ويو! جڏھن ھن واقعي جي خبر پوري سنڌ ۾ پکيڙجي وئي، تھ پوءِ سنڌ جي وڏي وزير نوٽس ورتو!
مقامي انتظاميا ۽ امن امان جي صورتحال تي هڪ وڏو سواليه نشان آهي. وارثن جو چوڻ آهي ته اسان سان وڏو ظلم ٿيو آهي، اسان جي بيگناهه نياڻي جو قتل ٿيو آھي. جوابدارن کي فوري طور تي گرفتار ڪري ڪڙي مان ڪڙي سزا ڏني وڃي. هن افسوسناڪ واقعي تي خيرپور جي سماجي، سياسي ۽ انساني حقن جي تنظيمن پاران سخت لفظن ۾ مذمت ڪئي وئي آهي. اڳواڻن جو چوڻ آهي ته سنڌ ۾ عورتن مٿان وڌندڙ تشدد ۽ قتل جا واقعا سنڌي سماج لاءِ هڪ ناسور بڻجي ويا آهن. ضلعي انتظاميا ۽ ايس ايس پي خيرپور کان گهر ڪئي وئي آهي ته خالده چانڊيو جي قتل ۾ ملوث جوابدارن کي فوري طور تي گرفتار ڪري عبرتناڪ سزا ڏني وڃي ته جيئن مستقبل ۾ ڪو اهڙو قدم کڻڻ جي جرات نه ڪري سگهي. جڏھن ته ڊي سي خيرپور پڻ ھڪ تحقيقاتي ڪاميٽي جوڙي ھئي جنھن رپورٽ تيار ڪري ڊي سي خيرپور ۽ اعليٰ آفيسر ڏي موڪلي ڇڏي آھي ۔، خيرپور جي عوام پاران اھڙن واقعن جي سخت لفظن مذمت ڪئي وئي آھي.