سکر/ روهڙي (نمائندي وٽان) روهڙي ڀرسان ٻن ٻارڙن جي ماءُ گلان ڀارو کي ڪارنهن الزام مڙهي گوليون هڻي قتل ڪيو ويو، عدالت ۾ والد طرفان پٽڪو پيرن تي رکڻ کان پوءِ ناري گلان ڀارو چيو هو ته مون کي پڪ آھي ته مونکي قتل ڪيو ويندو، پر پيءُ پٽڪو لاھي ڏنو آھي، پيءُ جي عزت خاطر موت به قبول آھي، جهانگڙو ٿاڻي جي حد ڳوٺ شاهه بخش ڀارو ۾ ٻن ٻارڙن جي ماءُ گلان ڀارو کي ڪارنهن الزام مڙهي گوليون هڻي قتل ڪيو ويو، ڪجهه ڏينهن اڳ ناري گلان ڀارو ڪارنهن جو الزام لڳڻ بعد سکر جي سيشن ڪورٽ پهچي تحفظ جي اپيل ڪئي هئي، پيءُ امداد ڀارو جي منٿن بعد ناري گـُلان ڀارو گهر وڃڻ لاءِ راضي ٿي، ڪجھھ ڏينھن بعد کيس گوليون هڻي قتل ڪيو ويو، ذريعن موجب مقتولا ڪجهه ڏينهن اڳ جان بچائڻ لاءِ ٿاڻي تي پهتي هئي ۽ عدالت ۾ پيش ٿيڻ دوران به پاڻ کي بچائڻ لاءِ تحفظ جي اپيل ڪئي ھئي. پر پوءِ به پيءُ سان گڏ وڃڻ تي راضي ٿي وئي، ڪجھھ ڏينھن اڳ کيس گوليون هڻي قتل ڪيو ويو، جڏهن ته پوليس مک جوابدار مولا بخش ڀارو کي گرفتار ڪري ورتو ۽ وڌيڪ جاچ جاري آهي، لاش پوسٽ مارٽم کان پوءِ وارثن حوالي ڪيو ويو، ڪيس داخل نه ٿي سگهيو، جڏهن ته ايس ايس پي اظهر مغل موجب مقتول ناري ٻن ٻارن جي ماءُ هئي، جنهن کي مامي غيرت جي نالي تي قتل ڪيو آهي، جوابدار کي گرفتار ڪري قتل ۾ استعمال ٿيل اوزار برآمد ڪيو ويو آهي. ذريعن موجب قتل ڪيس ۾ وڌيڪ هڪ جوابدار کي گرفتار ڪيو ويو، هن وقت تائين مقتولا ناري جي مڙس ۽ مامي کي گرفتار ڪيو ويو آهي، ٻئي پاسي ناري جي بيگناھھ قتل تي انساني حقن جي تنظيمن ۽ سماجي تنظيمن کان گھر ڪئي وئي آھي تھ ناري جي بيگناھھ قتل تي آواز اٿاريو وڃي.